اسلام آباد۔9فروری (اے پی پی):وزیر اعظم عمران خان احساس کفالت دے تحت مستحقین دے اندراج دا جائزہ گھنݨ تے انھاں نال ڳالھ مہاڑ کیتے صبحائیں بدھ کوں اسلا م آباد دے مختلف علاقیں دادورہ کریسن، نویں مستحقین دا اندراج نویں سروے دے اعدادوشمار تے منحصر اے ، احساس سروے 68 فیصد مکمل تھی چکے تے نویں سروے دے تحت نشاندہی کیتے ونڄݨ آلے مستحق لوکاں کوں اڄ ٻدھ کوں ادائیگیاں کیتیاں ویسن ۔تخفیف غربت و سماجی تحفظ ڈویژن توں جاری پریس ریلیز موجب نویں سروے دے ذریعے اندراج کیتے ونڄݨ آلے سارے مستحق لوکاں کوں مستقل بنیاداں تے2000روپے مہینہ ݙتے ویسن تاں جو انھاں دیاں بنیادی ضرورتاں کیتے مدد کیتی ونڄ سڳے ۔ مجموعی طور تے 70لکھ مستحقین کوں احساس کفالت اچ رلایا ویسی ، انہاں کوں جنوری توں جون2021تئیں دی مدت کیتے 12000روپے ݙتے ویسن ۔ہر مستحق بندے کوں ایس ایم ایس ملسی جیں توں اے ݙسایا ویسی جو انہاں کوں احساس پروگرام اچ رلایا ڳئے تے او آپݨی امدادی رقم وصول کرسڳدن ۔ ایندے توں علاوہ ایں حوالے نال انہاں کوں ہک سرکاری خط وی ملسی اے مستحق تریمتاں 6000روپے فی سہ ماہی وصول کریسن ۔خیبر پختونخواہ، گلگت بلتستان تے آزاد جموں کشمیر دی مستحقین بائیومیٹرک اے ٹی ایمز، مقرر کیتی ڳئی ریٹیل شاپس اتے بینک الفلاح دی کیمپ سائٹس توں جݙاں جو پنجاب، سندھ، بلوچستان اتے اسلام آباد دی مستحقین حبیب بینک دی کیمپ سائٹس توں رقم نکلوا سڳسن ، سارے نویں کفالت مستحقین 8171توں پیغام ملݨ توں بعد بائیومیٹرک اے ٹی ایمز اتے بینک برانچاں توں رقم حاصل کرسڳسن ۔
