اسلام آباد۔4اکتوبر (اے پی پی) وفاقی وزیر اطلاعات، نشریات، قومی ورثہ تے ثقافت عطاءاللہ تارڑ آکھیا جو ایس سی او اجلاس پاکستان کیتے وݙا اعزاز اے، ایں موقع تے احتجاج منفی سنیھا اے، پی ٹی آئی سی پیک شروع تھیوݨ تے وی دھرنا ݙتا ہئی۔ علی امین گنڈاپور کوں مشورہ اے جو او پشاور ونڄن اتے عوام دی بہتری کیتے کم کرن۔ احتجاج تھیندے رہندن ایندے نال کوئی فرق نی پوندا۔ اصل معاملہ معیشت کوں ودھاوݨ اے اتے جئیں تے اساݙا فوکس اے، پاکستان کوں ہک عظیم ریاست ٻݨیسوں۔ شنگھائی تعاون تنظیم دا اجلاس پاکستان کیتے وݙا اعزاز اے۔ ایں موقع تے احتجاج منفی سنیھا اے۔ جمعے کوں پی ٹی وی ہیڈ کوارٹر اچ پریس کانفرنس توں خطاب کریندیں ہوئیں وفاقی وزیر اطلاعات آکھیا جو وزیراعظم شہباز شریف دی قیادت اچ حکومت خارجہ پالیسی دے محاذ تے کامیابیاں حاصل کیتن اتے پندھ جاری اے۔
انہاں آکھیا جو ملائیشیا دے وزیراعظم انور ابراہیم دا دورہ پاکستان ٻہوں کامیاب رہیے۔ ملائیشیا نال پاکستان دے برادرانہ اتے دوستانہ تعلقات ہن۔ ملائیشیا دے وزیراعظم انور ابراہیم دورہ پاکستان اچ تجارت تے سرمایہ کاری بارے معاملیاں کوں اڳوں ودھائے جیڑھا پاکستان کیتے چنڳی ڳالھ اے۔ انہاں آکھیا جو ایں دورے نال پاکستان دی معیشت کیتے چنڳا سنیھا اے۔ ٻاہرلے ملک توں اعلیٰ سطحی وفود دی پاکستان آوݨ معاشی اشایاں دی بہتری دی نوید اے۔ انہاں آکھیا جو وزیراعظم شہباز شریف ورلڈ اکنامک فورم دے موقع تے ملائیشیا دے وزیراعظم کوں دورہ پاکستان دی دعوت ݙتی ہئی۔ نال جاری اے۔ پاکستان ملائیشیا کوں 20 کروڑ ڈالر مالیت دا حلال گوشت اتے ہک لکھ ٹن باسمتی چاول برآمد کریسی۔ انور ابراہیم آکھیا جو یقین طور پاکستانو لوں گوشت، چاول اتے پام آئل دی درآمد سودھے تجارت اتے زرعی ٹیکنالوجی دے سارے شعبیاں اچ تعاون ودھسی اتے ݙوہیں ملک مصنوعی ذہانت (اے آئی)، ڈیجیٹل اتے سیمی کنڈکٹر سویں اہم شعبیاں نال ہنرمندکارکناں دے شعبے اچ وی تعاون کوں ودھسین۔ آندے کڄھ فینھ اچ سعودی عرب توں ہک اعلیٰ سطحی وفد پاکستان دا دورہ متوقع اے۔
انہاں ݙسیا جو پاکستان شنگھائی تعاون تنظیم کانفرنس دی میزبانی کریندا پئے جئیں اچ 12 ملکاں دی حکومتاں دے سربراہان شریک تھیسن۔ کئی ݙھاکیاں بعد شنگھائی تعاون تنظیم کانفرنس دا ایونٹ پاکستان اچ تھیندا پئے جئیں کیتے انتظامات کیتے ویندے پئن۔ اسلام آباد کوں سجایا ویندا پئے۔ انہاں آکھیا جو پاکستان سرمایہ کاری، تجارت اتے سیاحت کیتے ہک نواں مقام ٻݨ ڳئے۔ وفاقی وزیر آکھیا جو ملائیشیا نال معاملات چنڳے طریقے نال اڳوں ودھین۔ انہاں آکھیا جو اقوام متحدہ جنرل اسمبلی دا اجلاس ہووے یا اعلیٰ سطحی وفود دے دورے ہوون۔ پاکستان بارے ہر ملک چنڳی ڳالھ کریندا پئے۔ ترکیہ دے صدر نیویارک اچ وزیراعظم محمد شہباز شریف نال ملاقات اچ آکھیا ہئی جو پاکستان دی معیشت بہتر تھیندی پئی اے۔ اقوام متحدہ جنرل اسمبلی اجلاس دے بارے ڳالھ مہاڑ کریندیں ہوئیں وفاقی وزیر اطلاعات آکھیا جو وزیراعظم محمد شہباز شریف اقوام متحدہ جنرل اسمبلی اچ فلسطین اتے کشمیر دا مقدمہ بھرپور طریقے نال لڑیے۔ اساݙے سیاسی مخالفاں وی سوشل میڈیا تے وزیراعظم دے خطاب دی تعریف کیتی اے۔ فلسطین دے صدر وی تعریف کیتی اے اتے اسٹیٹ آف فلسطین سوشل میڈیا تے وزیراعظم شہباز شریف دی تقریر کوں لاتا جئیں تے ساریاں توں ودھ ویوز آئن۔ انہاں آکھیا جو الجزیرہ اخبار دے سوشل میڈیا پلیٹ فارمز اتے اقوام متحدہ دے آفیشل یوٹیوب چینل تے وی وزیراعظم شہباز شریف دی تقریر ساریاں توں ودھ واری ݙٹھی ڳئی اے۔
انہاں آکھیا جو وزیراعظم اقوام متحدہ جنرل اسمبلی اچ برہان وانی دا وی ذکر کیتے۔ انہاں آکھیا جو اقوام متحدہ جنرل اسمبلی اجلاس اچ دنیا کوں سنیھا ݙتے جو پاکستان کوں موسمیاتی تبدیلی دے منفی اثرات نال نقصان تھیندا پئے۔ پاکستان دا کاربن اخراج صرف ہک فیصد اے اتے جئیں ویلھے چھل امدے تاں ساریاں توں ودھ خمیازہ پاکستان کوں بھگتݨا پوندے۔ انہاں آکھیا جو ملائیشیا دے وزیراعظم نال وی کشمیر اتے فلسطین دے مسئلیاں تے وی ڳالھ تھئی اے جئیں تے ملائیشیا دے وزیراعظم آکھیا جو کشمیر دے معاملے تے اقوام متحدہ دی سیکورٹی کونسل دی قراردادتے عمل تھیوݨا چاہیدے۔ معیشت بارے ڳالھ مہاڑ کریندیں ہوئیں وفاقی وزیر اطلاعات آکھیا جو اقوام متحدہ جنرل اسمبلی اجلاس دے موقع تے آئی ایم ایف پروگرام فائنل تھیے، آئی ایم ایف پروگرام دے اعلان نال اساݙی معیشت ٻئے مستحکم تھئی اے۔ آئی ایم ایف اتے ورلڈ بینک اساݙی معاشی ترقی دی تعریف کیتی اے۔ انہاں آکھیا جو ایف بی آر دی ڈیجیٹلائزیشن تھیندی پئی اے۔ لوکاں وݙی تعداد اچ ایف بی آر نال رجسٹرڈ وی کائنا ہئی جیڑھی ہݨ ݙو گنا ودھ ڳئی اے۔ انہاں آکھیا جو مہانگ پچھلے سال32 فیصد تے ہئی جیڑھی ڳھٹ تھی تے 6.9 فیصد تے آڳئی اے۔ پٹرولیم مصنوعات دے نرخ وی ڳھٹ تھین۔ ٹرانسپورٹ دے کرایے ڳھٹ تھین۔ اٹا بنیادی لوڑھ اے، اٹا پچھلے سال 160 روپے کلو ہئی جیڑھا ہݨ 80 روپے کلو تے آڳئے۔ انہاں آکھیا جو وزیراعظم شہباز شریف دی نشابر اے اتے ملک تے قوم دی خدمت تے انہاں دا فوکس اے۔
وفاقی وزیر اطلاعات آکھیا جو اڄ عالمی جریدے وی منیندے پئن جو پاکستان دی معشت بہتری آلے پاسے ویندی پئی اے۔ ملائیشیا دے وزیراعظم انور ابراہیم وی وزیراعظم شہباز شریف دی تعریف کیتی اتے آکھیا جو شہباز شریف باصلاحیت اتے کم کرݨ آلے بندے ہن۔ انہاں آکھیا جو وزیراعظم شہباز شریف دی محنت دا نتیجہ سامھے امدا پئے اتے اسٹاک مارکیٹ روز نویں ریکارڈ ٻݨیندی پئی اے۔ مہانگ ڳھٹ تھیوݨ دے اثرات کوں عوام تئیں پڄاوݨ کیتے صوبائی حکومتاں دی وی ذمہ واری اے۔ ایں بارے وزیراعلیٰ پنجاب مریم نواز شریف ٻہوں چنڳا کم کیتے۔ انہاں پنجاب اچ ٹرانسپورٹ کرائے ڳھٹ کروائے، پنجاب اچ پرائس کنٹرول میکنزم ٻہوں بہتر اے۔
وفاقی وزیر اطلاعات آکھیا جو وزیراعلیٰ خیبر پختونخوا اگر آپݨے ٻئے معاملیاں توں فری تھی ونڄن تاں او آپݨے صوبے دے معاملیاں کوں ٹھیک کرن۔ خیبرپختونخوا دی عوام کوں سہولتاں ݙیون۔ پرائس کنٹرول کمیٹیاں ٻݨاون۔ کرایے ڳھٹ کرن۔ مہانگ اچ ڳھٹکی دے اثرات آپݨے صوبے دی عوام کوں ݙیون۔ ہکس وال دے ولدے اچ انہاں آکھیا جو ملائیشیا دے وزیراعظم پاکستان دے دورے تے ہن۔ ایں موقع تے احتجاج نال منفی سنیھا ویندے۔ پی ٹی آئی جݙاں اپوزیشن اچ ہئی تاں انہاں سی پیک کوں تاخیر دا شکار کرݨ دی کوشش کیتی۔ بانی چیئرمین پی ٹی آئی پوری دنیا کوں نارض کیتا۔ انہاں آکھیا جو شنگھائی تعاون تنظیم ہک ٻہوں وݙا ایونٹ اے، ٻہوں عرصے بعد ایجھا ایونٹ پاکستان اچ تھیندا پئے۔ اساݙی کوشش اے جو اساں ٻاہرلے ملک دے وفود کوں پاکستان دی خوبصورتی بارے ݙسیسوں۔ ملائیشیا دے وزیراعظم وی آکھیا جو سکردو آوݨ آلے شہریاں دے تعداد ترائے گنا ودھی اے۔ انہاں آکھیا جو معیشت بہتر تھیندی پئی اے۔ پوری دنیا پاکستان دی معاشی ترقی کوں منیندی پئی اے۔ انہاں آکھیا جو مزمان کوں پاکستان دے اندر ویلکم کرݨ اتے چنڳا پاکستان ݙکھاوݨ اساݙی ذمہ واری اے۔ اساں اینکوں پورا کریسوں۔ ٻاہرلے ملک دے اعلیٰ سطحی وفود دے دوریاں دے موقع تے احتجاج نامناسب اے۔ اپوزیشن پارلیمنٹ دے فلور تے احتجاج کرے، سڑکاں تے احتجاج نال منفی اثر پوندے۔
ہک ٻئے سوال دے ولدے اچ انہاں آکھیا جو وزیراعلیٰ خیبر پختونخوا اگر آپݨے ٻئے معاملیاں توں فری تھی ونڄن تاں او آپݨے صوبے دے معاملیاں کوں ٹھیک کرن۔ خیبرپختونخوا دی عوام کوں سہولتاں ݙیون۔ پرائس کنٹرول کمیٹیاں ٻݨاون۔ کرایے ڳھٹ کرن۔ مہانگ اچ ڳھٹکی دے اثرات آپݨے صوبے دی عوام کوں ݙیون۔ احتجاج تھیندے رہندن ایندے نال کوئی فرق نی پوندا۔ اصل مسئلہ معیشت کوں ودھاوݨ اے جئیں تے اساݙا فوکس اے۔ پاکستان کوں ہک عظیم ریاست ٻݨیسوں۔
