اسلام آباد۔3اکتوبر(اے پی پی) وفاقی وزیر تجارت جام کمال خان آکھیے پاکستان اتے ملائیشیا وچال ݙوپاسے تجارت ودھاوݨ دے وسیع امکانات موجود ہن، ملائیشیا کوں چاول ، امب تے حلال گوشت دی برآمدات ودھا تے کثیرزرمبادلہ ڳھدا ونڄ سڳدے ۔ اے ڳالھ انھاں آپݨے ملائیشین ہم منصب نال ملاقات اچ آکھی ۔ وفاقی وزیر تجارت ملائیشیا دے وزیر سرمایہ کاری وتجارت ٹینگو عبدالعزیز نال ݙو پاسے تجارت ودھاوݨ تےپاکستان توں ملائیشیا کوں برآمد کیتی ونڄݨ آلی مصنوعات تے تجارتی رکاوٹاں گھٹ کرݨ تے ڳالھ مہاڑ کیتی ۔ ملاقات اچ وزیر تجارت جام کمال ٻئے شعبیں اچ سرمایہ کاری دے حوالے نال جامع حکمت عملی اپناوݨ تے غور کیتا ڳئے ۔ وفاقی وزیر تجارت آکھیے پاکستان دے تقریباً سارے شعبیں اچ ترقی دے امکان موجود ہن تے ملائیشیا دے سرمایہ کاراں کوں انھاں موقعیں توں فیدہ گھنݨا چاہیدے ، انھاں آکھیے پاکستان دنیا اچ اعلیٰ معیار دے چاول اتے امب برآمد کریندے تے ملائیشیا اچ پاکستانی امب ، حلال گوشت تے چاول دی ٻہوں منگ اے ، ملائیشیا چاول دی درآمد سانڳے پاکستان نال مزید تعاون کرے، حکومت پاکستان چاول دی گھٹ توں گھٹ برآمدی قیمت (ایم ای پی) کوں ہٹا ݙتے جیں توں پاکستانی برآمد کنندگان کوں مسابقتی قیمتاں تے ڳالھ مہاڑ کرݨ دا موقع ملسی ۔ انھاں پاکستانی گوشت اتے جیلیٹن برآمد کرݨ آلی کمپنیاں سانڳے ایکریڈیٹیشن دے عمل اچ سہولت ݙیوݨ تے زور ݙتا ، انھاں آکھیے ایں شعبے اچ تعاون توں تجارتی بہاؤ اچ ودھارا تھی سڳدے ۔ وزیر تجارت آکھیے پاکستانی تاجراں کوں ملائیشیا سانڳے گوشت دی برآمد اچ اوکھ کوں حل تے طریقہ کار سوکھا بݨایا ویندا پئے ایں توں تجارتی حجم اچ ودھارا تھیسی ، ایں توں انڄ ملائیشیا دے وزیر تجارت پاکستان کوں آسیان دی سرگرمیاں اچ شرکت دی دعوت ݙتی کیوں جو ملائیشیا آسیان دی سربراہی سنبھیندا پئے
