اسلام آباد۔21ستمبر(اے پی پی) صدر مملکت آصف علی زرداری آکھیے جو اساں ساریں کوں اقوامِ عالم وچال امن، رواداری اتے بقائے باہمی دے کلچر کوں ودھارا ݙیوݨا چاہیدے ،بین الاقوامی قوانین تے انسانی حقوق دی کھلی خلاف ورزیاں عالمی امن و سلامتی سانڳے سنگین خطرہ ہن، اساکوں ناانصافی تے ظلم دے خلاف آواز چاوݨ دی لوڑھ اے ، دنیا امن دے بغیر ترقی اتے خوشحالی نی گھن سڳدی ، دنیا دی ترجیح جھیڑیں دی بجائے اِنسانیت دے مسئلیں دا حل ہووݨا چاہیدے ۔ایوان صدر میڈیا ونگ توں جاری سنھیے اچ صدر مملکت عالمی یوم امن دے موقع تے اقوامِ عالم وچال امن دے اصولاں نال آپݨی جڑت دا اعادہ کریندے آکھیے اڄوکے سال عالمی یوم امن دا موضوع “امن دے کلچر کوں ودھارا ݙیوݨ “اے، اساں ساریں کوں اقوامِ عالم وچال امن، رواداری اتے بقائے باہمی دے کلچر کوں ودھارا ݙیوݨا اے اڄ دنیا کوں مختلف علاقیں اچ جغرافیائی سیاسی کشیدگی اتے جھیڑیں دا سامݨا اے ۔ صدر مملکت آکھیے جیڑے عالمی امن کوں خطرے اچ پیندے پئن ،اسرائیل فلسطین اچ دہشت گردی دا بازار گرم کر رکھیے، اسرائیل ہزاراں لوکاں دے غزہ اچ قتل عام توں فلسطینیاں دی نسل کشی کریندا پئے ۔ صدر مملکت آکھیے ہندوتوا توں متاثر مودی حکومت غیر قانونی مقبوضہ جموں و کشمیر اچ سنگین انسانی حقوق دیاں خلاف ورزیاں کریندی پئی اے ، مودی حکومت بھارت اچ مسلماناں اتے ٻئی اقلیتاں کوں ظلم دا نشانہ بݨیندی پئی اے ، بھارت مسلماناں دے بنیادی حقوق کھسیندا پئے ۔ صدر مملکت مزید آکھیے بین الاقوامی قوانین اتے انسانی حقوق دی کھلی خلاف ورزیاں عالمی امن و سلامتی سانڳے سنگین خطرہ ہن، اساکوں ناانصافی تے ظلم دے خلاف آواز چاوݨ دی لوڑھ اے ، دنیا دی ترجیح جھیڑیں دی بجائے اِنسانیت کوں پیش آندے مسئلیں دا حل ہووݨا چاہیدے ، غربت، بھک، ناانصافی، ظلم، عدم مساوات، بنیادی انسانی حقوق دی خلاف ورزیاں دے حل تے توجہ ݙیوݨی ہوسی ،دنیا امن دے بغیر ترقی تے خوشحالی نی گھن سڳدی ،جنگاں تے جھیڑے لوکاں سانڳے اوکھ تے مصیبتاں ودھیندن ۔ صدر مملکت آکھیے آؤ امن، رواداری اتے انسانی وقار دے احترام دے فروغ سانڳے آپݨے عزم دا اعادہ کروں اساں سارے رل تے ھک پرامن مستقبل تے ھک چنڳی دنیا بݨا سڳدوں ، اساں ایجھی دنیا بݨا سڳدوں جتھاں ساݙیاں آندیاں نسلاں امن تے ہم آہنگی نال کٹھے رہ سڳن۔
