اسلام آباد۔13ستمبر(اے پی پی) وزیراعظم محمد شہباز شریف آکھیے پالیسی ریٹ تے مہانگ اچ کمی ، زرعی اجناس، آئی ٹی دی برآمدات اتے ترسیلات زر اچ ریکارڈ ودھارا ٹھئے ، ملک کوں اوکھ توں کڈھݨ تے ترقی تے خوشحالی دے رستے تے ٹورݨ سانڳے نینگراں کوں بااختیار بݨا تے اساکوں یکسوئی، سانجھیاں کوششاں تے واضح سوچ نال اڳوں ودھݨا اے ، آئی ایم ایف دے 25 ستمبر کوں تھیوݨ آلے اجلاس اچ پاکستان ایجنڈے اچ شامل اے۔ اے ڳالھ انھاں پاکستان مسلم لیگ (ن) توں تعلق رکھݨ آلے ینگ پارلیمنٹیرینز کوں ملاقات اچ آکھی اے ۔ وزیراعظم آکھیے پالیسی ریٹ اچ 200 پوائنٹس دی کمی آئی اے جیں توں صنعتکاراں، سرمایہ کاراں، زرعی شعبہ اتے کاروبار نال جڑیے لوکاں کوں ریلیف ملیے، امید ہے جو اے مزید گھٹ تھیسی اے ݙوہیں چنڳیاں ڳالھیں ہن ساݙی معیشت سدھے پاسے ٹردی پئی اے ، مہانگ تکھے گھٹ تھئی اے ، گزریل سال مہانگ دی شرح 32 فیصد ہئی جیڑھی ہݨ 9.6 فیصد اے، ٻاہرلے ملک پاکستانی اپݨی محنت دی کمائی توں ترسیلات زر بھجویندے پئن جیں اچ ریکارڈ ودھارا تھئے ۔ وزیراعظم آکھیے اڄوکے مالی سال اچ زرعی اجناس آئی ٹی دی برآمدات اچ چںڳاں ودھارا تھئے ، آئی ٹی دی برآمدات اچ مزید ودھارے سانڳے کوشاں ہیسے، انفارمیشن ٹیکنالوجی دی وزیر مملکت اپݨی ٹیم دے رلے ایں تناظر اچ چنڳی محنت کریندیاں پئن ، سارے معاشی اشاریے مثبت ہن، لہہ چڑھ آندے رہندن ، حالات دا دھارا بدلݨ دا فیصلہ کرݨ آلیاں طاقتاں کامیابی ڳھدی ، پاکستان اچ انھاں حالات کوں بدلݨ دا ویلھا آڳئے، اساکوں یکسوئی، سانجھیاں کوششاں تے واضح سوچ نال اڳوں ودھݨا اے ، اساں ملک کوں اوکھ توں کڈھݨ دا رستہ چُݨ ڳھدے پاکستان ماضی دیاں غلطیاں توں سبق سکھ تے اقوام عالم اچ آپݨی جاہ بݨیسی ، نینگر نسل دا ایں وچ کلیدی کردار اے اساکوں سارے شعبیں نال جڑیے نینگراں کوں مکمل طور تے تعلیم یافتہ اتے بااختیار بݨاوݨاں اے ، نینگراں کوں ممکن سہولتاں ݙیسوں جو او ملکی ترقی اچ کردار نبھا سڳن ۔ وزیراعظم آکھیے آئی ایم ایف دے 25 ستمبر کوں تھیوݨ آلے اجلاس اچ پاکستان ایجنڈے اچ شامل اے اساکوں ایں پروگرام سانڳے کئی اوکھ دا سامݨا کرݨا پئے ، ٹیکس لاتے ڳئن ، تنخواہ دار طبقے تے ٻوجھ پئے ، مہانگ گھٹ تھیوݨ توں تنخواہ دار طبقے تے ٻوجھ گھٹ پوسی ۔ وزیراعظم آکھیے ٹیکس نیٹ دے دائرے کوں ودھاوݨ سانڳے کوشاں ہیسے ، تاجر رزق حلال توں روزی کمیندن تے ملکی معیشت اچ حصہ پیندن، انہاں کوں آپݨے ٹیکس دی ادائیگی سانڳے ٻہوں کجھ کرݨا اے کہیں ھک شعبہ تے ٹیکس دا ٻوجھ پاوݨ نال نہ معاشرہ ترقی کرسڳدے تے نہ خوشحال تھی سڳدے زرعی شعبہ نال جڑیے کاروباری لوکاں کوں ٹیکس نیٹ اچ گھن آیا ویندا پئے، ٹیکس غبن مکاوݨ سانڳے ݙینھ رات کوشاں ہیسے، قرضیں تے آئی ایم ایف توں ایندے بغیر اجازت نہ ملسی ، میݙی کوشش اے اے آئی ایم ایف نال چھیکڑی پروگرام ہووے تے اساکوں ول آئی ایم ایف کنے نہ ونڄݨا پووےایں سانڳے سارے اہداف پورے کرݨے ہوسن ، سعودی عرب، چین، متحدہ عرب امارات ساݙے دوست ملک ہن انھاں آئی ایم ایف پروگرام گھنݨ اچ چنڳاں تعاون کیتے ، آرمی چیف جنرل سید عاصم منیر، نائب وزیراعظم سینیٹر اسحاق ڈار، وزیر خزانہ دی سربراہی اچ وزارت خزانہ دی ٹیم ایں پروگرام سانڳے چنڳی محنت کیتی اے آپݨے پیریں تے کھڑسوں تاں عزت بݨسی اساکوں ݙینھ رات محنت کرݨی ہوسی ، ﷲ تعالیٰ نیک نیتی نال محنت دا پھل ݙیندے ، اساکوں اے سبق ملدے جو اساں کݙاں تئیں قرضے تے چلسوں ، اساکوں ایں توں جند چھڑاوݨی ہوسی ، پوری قوم کوں رل تے محنت کرݨی ہوسی تاں جو رل تے محنت کرݨی ہوسی ایں دلدل اچوں نکل سڳوں ایندے بعد پوری دنیا اچ ساݙا ناں ہوسی ۔ ایں موقع تے سینیٹر اتے ارکان قومی اسمبلی سودھے ینگ پارلیمنٹیرینز نظم و نسق اتے قانون سازی متعلق تجویزاں پیش کیتیاں جنھاں دی وزیراعظم تعریف کیتی
