اسلام آباد۔13جنوری (اے پی پی) وزیراعظم شہباز شریف وفاقی حکومت دے گھٹ لاڳت گھراں دے جاری منصوبیں کوں وختی مکمل کرݨ، سرمایہ کاری ودھاوݨ سانڳے نجی شعبے دی سانجھ تے ہاؤسنگ دے منصوبیں دی تعمیر دی تھرڈ پارٹی ویلیڈیشن یقینی بݨاوݨ تے تعمیراتی منصوبیں کوں معینہ مدت اچ مکمل کرݨ دی ہدایت کریندے آکھیے جو پاکستان دے ہر شہری کوں گھٹ لاڳت رہائش ݙیوݨ سانڳے حکومت ہرممکن اقدامات کریسی ۔ وزیراعظم آفس دے میڈیا ونگ توں جاری بیان موجب وزیراعظم شہباز شریف دی ِصدارت اچ وزارت ہاؤسنگ دے جاری منصوبیں تے جائزہ اجلاس تھئے ۔ وزیراعظم اجلاس اچ ہدایت کیتی جو سرکاری ملازمین اتے عوام سانڳے بݨائے ونجݨ آلے منصوبیں سانڳے بین الاقوامی شہرت یافتہ تعمیراتی کمپنیاں چݨیاں ونڄن ، تعمیراتی منصوبیں سانڳے کمپنیاں دا انتخاب شفاف طریقہ کار اتے میرٹ تے کیتا ونڄے ۔تعمیراتی منصوبیں کوں معینہ مدت اچ مکمل کیتا ونڄے۔ اجلاس اچ وزیراعظم کوں پی ڈبلیو ڈی اتے ٻئے غیر فعال اداریں دی تحلیل دے حوالے نال اقدامات بارے ݙسایا ڳئے ۔ وزیراعظم پی ڈبلیو ڈی اتے ٻئے غیر فعال اداریں دی تحلیل نال کرپشن اچ کمی تے اطمینان کریندے آکھیے ملازمین کوں موجودہ سرکاری گھراں دی الاٹمنٹ دے نظام دی ڈیجیٹائیزیشن خوش آئند اے، پاکستان دے ہر شہری کوں گھٹ لاڳت رہائش ݙیوݨ سانڳے ہر ممکن اقدام کریسوں ،شہریاں کوں گھٹ لاڳت گھر ݙیوݨ سانڳے منصوبیں اچ کرپشن دی کمی سانڳے اصلاحات دا عمل جاری اے۔ انہاں آکھیے حکومت دیاں کوششاں نال پاکستان دا عالمی منظر نامہ تے تشخص بحال تھئے ، ملک اچ بین الاقوامی کرکٹ، ٻئے کھیݙ تے عالمی عالمی کانفرنساں تھیندیاں پئن ، ٻاہرلے ملک توں آئے مہماناں سانڳے ملک اچ بین الاقوامی معیار دے ہوٹلز، ہسپتال اتے ٻیاں سہولتاں بݨائیاں ونڄن وزیراعظم وزارت ہاؤسنگ توں بین الاقوامی معیار دی سہولتاں سانڳے جامع پلان منگ ڳھدا ۔ وزیراعظم قومی ہاؤسنگ پالیسی دی تشکیل مارچ تئیں مکمل کرتے منظور کراوݨ دی ہدایت کیتی ۔ وزیراعظم آکھیے وزارت دے تحت جاری عوامی رہائشی منصوبیں کوں وختی مکمل کیتا ونڄے تاں جو ورکنگ کلاس کوں وختی گھٹ لاڳت رہائش مل سڳے ۔ وزیراعظم وزارت ہائوسنگ تے ٻئیاں وزارتاں اچ غیر فعال اداریں دی تحلیل و ٻئی اصلاحات سانڳے ھک کمیٹی بݨاوݨ تے ایں کمیٹی کوں نہ صرف وزارت ہائوسنگ بلکہ ٻیاں وزارتاں کوں وی اصلاحات اچ ضروری معاونت ݙیوݨ دی ہدایت کیتی ۔اجلاس اچ وزارت ہاؤسنگ وزیراعظم کوں وزارت دے مختلف اداریں اچ جاری اصلاحات تے پیشرفت اتے پالیسی اقدامات دا ݙسائے اجلاس کوں ݙسایا ڳئے جو قومی ہاؤسنگ پالیسی 2001 اچ ترامیم سانڳے سارے سٹیک ہولڈرز نال مشارت مکمل کرڳھدی ڳئی اے تے وزیراعظم دی ہدایات دی روشنی اچ مارچ 2025 تئیں ایں دی حتمی منظوری دا عمل مکمل کر ڳھدا ویسی۔ اجلاس کوں ݙسایا ڳئے سرکاری ملازمین کوں گھراں دی الاٹمنٹ اتے کرائے گھنݨ دے نظام کوں ڈیجیٹل کرݙتا ڳئےجیں توں کرپشن مکاوݨ ممکن ہوسی تے نظام اچ شفافیت آسی ۔ وزیراعظم کوں پاکستان ہاؤسنگ اتھارٹی دے تحت جاری اتے مستقبل دے منصوبیں دے حوالے نال ݙسایا ڳئے ۔ اجلاس کوں ݙسایا ڳئے جو ایں ویلھے کچلاک کوئٹہ اچ 630 گھٹ لاڳت رہائشی یونٹس جݙاں جو اسلام آباد اچ 4112 رہائشی یونٹس تے کم تکھے جاری اے ۔ وزیراعظم انہاں منصوبیں دی وختی تکمیل اتے تھرڈ پارٹی ویلیڈیشن دی ہدایت کیتی۔ اجلاس کوں مزید ݙسایا ڳئے پشاور اچ 5728 گھٹ لاڳت رہائشی یونٹس تے وختی جݙاں جو مستقبل نیڑے اچ راولپنڈی اتے اسلام آباد اچ 5600 رہائشی یونٹس تے کم شروع کیتا ویسی ۔ وزیراعظم سارے رہائشی منصوبیں اچ چنڳی شہرت دی تعمیراتی کمپنیاں دی خدمات گھنݨ دی ہدایت کیتی۔ وزیرِ اعظم کوں فیڈرل گورنمنٹ ایمپلائز ہائوسنگ اتھارٹی دے امور تے تفصیلی بریفنگ ݙتی ڳئی ۔ اجلاس کوں فیڈرل گورنمنٹ ایمپلائز ہاؤسنگ اتھارٹی دی ڈیجیٹائیزیشن اتے اصلاحات تے وی بریفنگ ݙتی ڳئی ۔ اجلاس کوں ݙسایا ڳئے جو آن لائن ادائیگی، شکایتاں دے ازالے سانڳے ڈیجیٹل نظام، ون ونڈو آپریشن، رئیل ٹائم مانیٹرنگ، جیو ٹیگنگ و ٻئی اصلاحات نال نظام اچ شفافیت اتے تکھا کرݨ سانڳے اقدامات کیتے ویندے پئن اجلاس کوں اتھارٹی دی طرفوں اسلام آباد اچ بین الاقوامی معیار دیاں سہولتاں بشمول فائیو سٹار ہوٹل، ہسپتال، آئی ٹی پارک، اپارٹمنٹ کمپلیکسز تے بین الاقوامی معیار دے سکول دی تعمیر دے منصوبیں دا وی ݙسایا ڳئے ۔ وزیرِ اعظم ایں حوالے نال وختی تعمیراتی لاگت اتے درکار ویلھے نال ھک جامع لائحہ عمل پیش کرݨ دی ہدایت کیتی ۔اجلاس اچ وفاقی وزراء ریاض حسین پیرزادہ، احد خان چیمہ، عطاء اللہ تارڑ اتے متعلقہ اعلیٰ حکام شرکت کیتی
