اسلام آباد۔27نومبر(اے پی پی) وزیراعظم محمد شہباز شریف آکھیے اسلام آباد اچ تحریک انتشار فساد برپا کیتے، ملک افراتفری اتے خون ریزی دا متحمل نی تھی سڳدا ، فساد تے انتشار دی سیاست دی حوصلہ شکنی ناگریز اے، فسادیاں نال اوکھے ہتھاں نال نبݨیا ویسی ، 9 مئی دے ملزماں کوں عدالتاں وختی سزا ݙیندیاں تاں اے سارا کجھ نہ تھیندا ۔ اے ڳالھ انھاں وفاقی کابینہ دے اجلاس اچ ڳالھ مہاڑ کریندے آکھی ۔ وزیراعظم محمد شہباز شریف آکھیے اسلام آباد اچ ھک واری ول فساد برپا کیتا ڳئے ، قانون نافذ کرݨ آلے اداریں بہترین حکمت عملی دے ذریعے ایں نال نبݨیے عوام کوں سکون آئے، فساد پاروں پاکستان اچ بالخصوص اسلام آباد اچ معیشت کوں ضیان پڄےا، کئی ݙینھ توں کاروبار نہ تھیوݨ دے برابر ہئی ، دکاناں بند ہن ، تاجر دہائیاں ݙیندے پئے ہن ۔ انھاں آکھیے فیکٹری مالکان، ݙیہاڑی دار مزدور سارے پریشان ہن، ہسپتالاں اچ مریضاں کوں مشکلات دا سامݨا ہئی، جاڑے شہراں اچ نظام زندگی معطل تھی چکیا ہئی ۔ انہاں آکھیے سٹاک ایکسچینج 99 ہزار 300 دا ریکارڈ قائم کیتا ہئی ، گزریل ھک ݙینھ اچ 4 ہزار پوائنٹس دی کمی تھئی، اے انھاں فسادیاں دی وجہ توں تھئے جیڑھا ملک دی ترقی و خوشحالی دے دشمن بݨ چکن ، گزریل رات امن بحال تھیوݨ دے بعد سٹاک ایکسچینج اڄ 99 ہزار تئیں پڄ چکے، انھاں آکھیے دنیا اچ مسلمہ اصول اے، سرمایہ کاری اتھاں تھیندی اے جتھاں امن و سکون تھیوے تے منافع کماوݨ دے ٻہوں چنڳے موقع میسر آون۔ انہاں آکھیے ایجھی خطرناک روش 2014ء توں پہلے کائناں ہئی ، ایں توں پہلے کوئی اسلام آباد تے چڑھائی دا تصور وی کائناں ہئی ، لوک شہراں اچ احتجاج کریندے ہن تے انہاں کوں آئین و قانون موجب پرامن احتجاج دا حق حاصل اے۔ وزیراعظم آکھیے 2014ء توں بدقسمتی نال ایں خطرناک روش دی بنیاد پاتی ڳئی، چینی صدر شی جن پنگ ستمبر 2014ء اچ پاکستان دے دورے تے آندے پئے ہن ، فسادیاں 126 ݙینھ فساد پاتی رکھیا ایں دے نتیجے اچ چینی صدر دا دورہ ملتوی تھیا تے اپریل 2017ء اچ او پاکستان دے دورے تے آئے ۔ شہباز شریف آکھیے شنگھائی تعاون تنظیم دے اجلاس دے موقع تے انھاں فسادیاں ول فساد برپا کیتا، دوست ملکاں دے مہماناں اچ تشویش دی لہر دوڑ ڳئی، ایں موقع تے سکیورٹی چیلنجز نال چنڳے انداز اچ نبݨݨ ، اجتماعی بصیرت اتے منصوبہ بندی نال اے کامیابی ملی، پاک فوج مکمل سکیورٹی دی ذمہ واری سنبھالی، سعودی وفد دے دورے دے موقع تے ادھم مچایا ڳیا، تخریب کاری کیتی ڳئی ، غیر ملکی اسلحہ گھن تے آندن ، بے گناہ شہریاں کوں تنگ ، زخمی اتے شہید کریندن ، اسلام آباد پولیس دے اہلکار کوں شہید کیتا ڳئے تے بے شمار زخمی تھئن ۔ انہاں آکھیے کوئی محب وطن شہری جیں کوں مک دی عزت، تعلیم، روزگار اتے ترقی دے موقع ݙیوے او ایں دا دشمن تھی ونڄے ، پاکستان دی مخالفت کرے، ایں حد تئیں چلیا ونڄے جو ملک برباد تھی ونڄے تے ایں کوں کوئی پرواہ نہ ہووے ، خطرناک روش اساکوں اے سوچݨ تے مجبور کرݙتا اساکوں سانجھی مشاورت اتے صلاح مشورے توں سخت فیصلے کرݨے پوسن اساکوں پاکستان دی معیشت کوں بچاوݨا اے ، ترقی ݙیوݨی اے تے ملک خوشحال بݨاوݨا اے یا اساکوں دھرنیں دا سامݨا کرݨا اے سارے وسائل تے توانائی ایں اچ جھونکوں تے ملکی معیشت دا خٻاڑہ تھیوݨ ݙیوں ، ساݙے ݙو رستے ہن ، اساکوں فیصلہ کرݨا اے جو کیڑھا رستہ اختیار کرݨا اے ، ظاہراے ھک رستہ اے تے او پاکستان دی ترقی و خوشحالی دا راستہ اے، حکومت، مقننہ تے سارے اداریں کوں رل تے فیصلہ کرݨا اے انھاں فسادیاں اتے ملک دشمناں دا ساتھ اساکوں نی ݙیوݨا چاہیدا۔ انہاں آکھیے بیلاروس دے صدر الیگزینڈر لوکا شینکو ھک واری ول پاکستان دے دورے تے آئے ۔ انھاں نال ملاقات اچ مختلف شعبیں اچ تعاون ودھاوݨ تے تفصیلی ڳالھ مہاڑ کیتی ڳئی، او انھاں منصوبیں تے عملی پیشرفت چاہندن ، دسمبر اچ ھک پاکستانی وفد بیلاروس دا دورہ کریسی تے معاہدیں کوں حتمی شکل ݙیسن، فروری اچ بیلاروس دے صدر اتے وزیراعظم پاکستان وچال فروری اچ معاہدے تھیسن، ݙوہیں ملک زراعت، زرعی مشینری سودھے ٻئے شعبیں اچ سرمایہ کاری دے موقع توں فیدہ چا سڳدن ۔ جݙاں اے پیشرفت تھیندی پئی ہئی ایں ویلھے فسادی بندوقاں تے ہتھیار گھن تے آئے ہوئے ہن ساݙے رینجرز تے پولیس دے جوان شہید تھئن، قانون نافذ کرݨ آلے اداریں دے اہلکار زخمی تھئن، ہرݙینھ میدان جنگ لڳی تاں توانائی کتھاں خرچ تھیسی ۔ 77 سال بعد وی اساں قرضیں اچ وٹھیے پیوں ، ساݙی معیشت ہݨ بتدریج استحکام آلے پاسے ٹردی پئی اے شہباز شریف آکھیے جے عدالتاں 9 مئی دے ملزماں کوں وختی سزاواں ݙیندیاں تاں اڄ اے ݙینھ نہ ݙیکھݨا ہوندا ، قانون ہاتھ اچ گھن تے قانون دیاں دھجیاں اݙاوݨ آلیں کوں سزاواں ملدیاں تاں ایویں نہ تھیندا ۔ انھاں حالات اچ پوری قوم کوں سوچ وچار کرتے فیصلہ کرݨا اے جو اساں اڳوں کیویں ودھݨا اے ، اسلام آباد پولیس، رینجرز، پنجاب پولیس، سندھ پولیس سودھے قانون نافذ کرݨ آلے اداریں دا شکر گزار ہاں جو انہاں رل تے تازہ ترین حملے کوں ناکام بݨائے تے انہاں کوں بھڄا تے پورا اسلام آباد خالی کرائے، خیبرپختونخوا اچ دہشت گردی پاروں صورتحال خراب اے، کرم ایجنسی اچ درجناں بے گناہ لوک شہید تھیئن ۔ خیبرپختونخوا حکومت کوں کرم ایجنسی، پارا چنار اچ امن و امان دی صورتحال دی بحالی تے آپݨی پوری توجہ مرکوز کرݨی چاہیدی اے ، اسلام آباد تے لشکر کشی دے دوران عسکری حکام بھرپور تعاون ݙتے، وزیر داخلہ، سیکرٹری داخلہ اتے انہاں دی ٹیم دا شکر گزار ہاں۔ وزیراعظم آکھیے انہاں کوں پاکستان ڈیفالٹ تھیوݨ توں بچ ونڄݨ دی تکلیف اے ۔ انہاں ساریاں کامیابیاں اچ ٹیم ورک دے نال نال آرمی چیف جنرل سیّد عاصم منیر دا اہم کردار اے۔ 2018 دے انتخابات اچ تاریخی دھاندلی تھئی ، ایں دا حساب تاں ݙے ݙیو ، ایں تے عمران خان انکوائری کمیٹی بݨاوݨ دا اعلان کیتا اڄ تئیں ایں کمیٹی دا کوئی اجلاس نی تھیا اڄ ول دھاندلی دا شور مچا تے اسلام آباد تے چڑھائی کریندن کہیں ݙوجھی جماعت دے احتجاج دے دوران ھک گملا وی کݙاہیں نی ترٹیا ، احتجاج توں روزانہ 190 ارب روپے دا ملکی معیشت کوں ضیان تھیندا پئے ۔ صحافیاں کوں ڳالھیں مندے کڈھیے ڳئن ، نیشنل پریس کلب تے حملہ کیتا ڳیا اے جمہوریت نی فسطائیت اے۔ اسلام آباد ہائیکورٹ حکم ݙتا جو بغیر اجازت ایں کوں نہ آوݨ ݙتا ونڄے انہاں ایں حکم دی خلاف ورزی کیتی ، سنگجانی اچ انہاں کوں جاہ ݙیوݨ دا آکھیا ڳئے ھک بندہ ضد تے اڑیاں رہیا ، پاکستان تے چوݨ آلے ہر ہتھ کوں بھن ݙیسوں ایں موقع تے شہداء دے ثواب سانڳے فاتحہ خوانی وی کیتی ڳئی
