راولپنڈی ۔22نومبر(اے پی پی) سکیورٹی فورسز دے بلوچستان تے خیبر پختونخوا دے علاقیں اچ آپریشن تے 3 مطلوب سودھے 6 دہشت گرد ماریے ڳئن ۔ آئی ایس پی آر موجب سکیورٹی فورسز بنوں اچ خوارج دی موجودگی دی اطلاع تے ھک انٹیلی جنس بیسڈ آپریشن کیتے۔آپریشن دے دوران سکیورٹی فورسز خوارج دے ٹھکاݨے کوں موثر طریقے نال نشانہ بݨائے جیں دے نتیجے اچ ترائے خوارج ماریے ڳئن تے ݙو زخمی تھئن ۔ماریے ونڄݨ آلے خوارج توں اسلحہ، گولہ بارود اتے دھماکہ خیز مواد برآمد کیتا ڳئے جیڑھا جو سکیورٹی فورسز دے خلاف ٻہوں ساریاں دہشت گرد کارروائیاں تے بے گناہ شہریاں دی ٹارگٹ کلنگ اچ ملوث ہن ۔علاقے اچ کیں وی باقی ماندہ خوارج کوں مکاوݨ سانڳے سرچ آپریشن جاری اے۔ آئی ایس پی آر موجب 20 تں 22 نومبر 2024 دے دوران بلوچستان اچ ترائے مختلف کارروائیاں اچ چار دہشت گرداں کوں ہلاک کیتا ڳئے ۔آواران اچ انٹیلی جنس معلومات دی بنیاد تے آپریشن دے دوران فائرنگ دے تبادلے دے بعد ݙو دہشت گرد ہلاک تھئن ۔ اے ݙوہیں ہائی ویلیو ٹارگٹ ہن جنہاں دی شناخت نیاز عرف گھمن اتے ظریف عرف شاہ جہاں دے طور تے تھئی ۔ڈیرہ بگٹی اچ آپریشن دے دوران ھک دہشت گرد کوں ہلاک کیتا ڳئے ۔کیچ ضلع اچ انٹیلی جنس دی بنیاد تے آپریشن دے دوران ھک ٻیا دہشت گرد ماریا ڳئے۔ ہلاک تھیوݨ آلے دہشت گرد کئی دہشت گردانہ کارروائیاں اتے بے گناہ شہریاں دے قتل اچ ملوث ہن تے قانون نافذ کرݨ آلے اداریں کوں مطلوب ہن ۔آئی ایس پی آر آکھیے جو پاکستان دی سکیورٹی فورسز قوم دے نال رل تے بلوچستان اچ امن، استحکام اتے ترقی کوں سبوتاژ کرݨ دی ہر کوشش کوں ناکام بݨاوݨ سانڳے پرعزم ہن۔
