اسلام آباد۔15نومبر(اے پی پی) وفاقی وزیر تجارت جام کمال خان آکھیے ٹیکسٹائل تے ملبوسات دا شعبہ پاکستان دی برآمدات اتے معیشت اچ اہم کردار ادا کریندا پئے ،حکومت ایں شعبے دی پائیداری تے ترقی سانڳے ودھ توں ودھ تعاون کریسی ۔ اے ڳالھ انھاں آل پاکستان ٹیکسٹائل ملز ایسوسی ایشن (اپٹما) دے وفد کوں ملاقات اچ آکھی ۔ ملاقات اچ ٹیکسٹائل اتے ملبوسات دے شعبے کوں سہولتاں ݙیوݨ دے حوالے نال ڳالھ مہاڑ کیتی ڳئی ۔ اپٹما دے چیئرمین کامران ارشد دی قیادت اچ اپٹما دے نمائندیں وفاقی وزیر نال ملاقات کیتی ۔ اپٹما دے وفد اچ عامر فیاض شیخ، چیئرپرسن ٹیکسٹائل کونسل کوہ نور ملز، انیس خواجہ، محمود گروپ، رحیم ناصر، عائشہ گروپ، نوید احمد ،انڈس ڈائنگ، نوید گلزار ،کریسنٹ ملز، اسد شفیع، کراس اسٹیچ شامل ہن ۔کامران ارشد ٹیکسٹائل اتے ملبوسات دے شعبے کوں پیش آندے اہم چیلنجز تے انھاں دے مضمرات دا خاکہ پیش کیتا جیں اچ صنعتی کیپٹیو پاور پلانٹس کوں گیس دی سپلائی دا ممکنہ منقطع تھیوݨ ، بجلی دیاں اُچیاں قیمتاں ، زیادہ ٹیکسز اتے لیکویڈیٹی دی کمی شامل اے جیڑھی جو صنعت دی مسابقت کوں ختم کرسڳدی اے ۔ اپٹما دے نمائندیں فنانس ایکٹ 2024 اچ متعارف کرائے ڳئن فیڈرل بورڈ آف ریونیو دی ایکسپورٹ فیسیلیٹیشن سکیم دے تحت ایکسپورٹرزسانڳے مقامی خریداری تے سیلز ٹیکس دی چھوٹ کوں واپس گھنݨ تے وی آپݨے تحفظات دا اظہار کیتے۔
