موجودہ دور اچ امت مسلمہ کوں پیش آندے مسئلے خاص طور تے معاشرے اچ پاتے ونڄݨ آلے انتشار ، نفاق ، ظلم تے ناانصافی دا واحد حل سیرت طیبہ اچ موجود اے ، صدر مملکت ڈاکٹر عارف علوی دا 12 ربیع الاوّل دے موقع تے قوم دے ناویں پیغام

اسلام آباد۔19اکتوبر (اے پی پی):صدر مملکت ڈاکٹر عارف علوی آکھیے جو حضورﷺ مساوات، بھرپی، عدل و انصاف تے مبنی معاشرہ تشکیل ݙتا تے رنگ، نسل ،خاندان ، زبان اتے وطن توں بالاتر ھک امت و ملت دا قیام عمل اچ گھن آئے، موجودہ دور اچ وی امت مسلمہ کوں پیش آندے مسئلیں بالخصوص معاشرے اچ پاتے ونڄݨ آلے انتشار ، نفاق ، ظلم اتے ناانصافی دا واحد حل سیرت طیبہ اچ موجود اے، حکومت دی پاکستان کوں ریاست مدینہ دے طرز دی ھک مثالی فلاحی مملکت بݨاوݨ دیاں کوششاں لائق تحسین ہن۔ 12 ربیع الاوّل 1443 ھ/ 2021ء دے موقع تے قوم دے ناویں آپݨے پیغام اچ صدر مملکت آکھیے جو 12 ربیع الاوّل دے پر مسرت و مبارک موقع تے پاکستانی قوم اتے ملتِ اسلامیہ کوں مبارک باد پیش کرینداں ۔ اساکوں اللہ تعالیٰ دا شکر کرݨا چاہیدے جو انہاں حضرت محمد خاتم النبیینﷺ کوں مبعوث فرما تے انسانیت تے احسان فرمایا تے اساکوں انہاں دے اُمتی ہووݨ دا شرف بخشیا۔انہاں آکھیے جو اللہ تعالیٰ آپؐ کوں سارے جہاناں کیتے رحمت بݨا تے مبعوث فرمایا ۔ آپؐ دی اطاعت و فرمانبرداری ہی ݙوہیں جہاناں اچ کامیابی کی کنجی اے ۔حضورﷺ نال محبت ہر مسلمان دے ایمان دا حصہ اے۔ اللہ رب العزت آپؐ کوں سارے انساناں دے پاسے بشیر، نذیر، نبی اُمی، سراج منیر اتے رحمۃ اللعالمین ﷺبݨا تے بھیجے ۔ صدر عارف علوی آکھیے آپ ؐ انسانیت کوں اللہ تعالیٰ دی وحدانیت تے ھک مٹھ کیتا تے عالم انسانیت تے دنیوی تے اخروی فلاح و کامرانیاں دے اسرار افشاں فرمائے۔ اے آپ ﷺ دا ہی اعجاز اے جو جانی دشمناں کوں ھک ݙوجھے دا خیر خواہ بݨا ݙتا ۔ آپ ﷺ ݙھاکیں توں متحارب قبائل کوں ریاست مدینہ دے فلاحی نظم دا حصہ بݨایا۔ آپؐ قبائلی عصبیت و قومیت دے بت کوں پاش پاش کر تے ایندی جاہ ھک عالمگیر مساوات، بھرپی تے عدل و انصاف تےمبنی معاشرہ تشکیل ݙتا۔ حضورﷺ رنگ، نسل ،خاندان ، زبان اتے وطن توں بالاتر ھک امت و ملت دا قیام عمل اچ گھن آئے ۔ آپ ؐ ایجھی فلاحی ریاست قائم کیتی جیں اچ امیر اتے غریب دے حقوق برابر ہن۔ موجودہ دور اچ وی ، امت مسلمہ کوں پیش آندے مسئلیں بالخصوص معاشرے اچ پاتے ونڄݨ آلی انتشار، نفاق ، ظلم اتے ناانصافی دا واحد حل سیرت طیبہ اچ موجود اے۔ انہاں آکھیے جو حکومت دی پاکستان کوں ریاست مدینہ دے طرز دی ھک مثالی فلاحی مملکت بݨاوݨ دیاں کوششاں لائق تحسین ہن۔ اسلام دے حقیقی تصور توں آشنا ہووݨ کیتے اساکوں سیرت طیبہ ﷺ کوں ڄاݨݨ دی لوڑھ اے تے میں امید کرینداں جو حکومت ایں کیتے سارے وسائل بروئے کار گھن آسی ۔ میݙی اللہ تعالیٰ توں دعا اے جو او ریاست مدینہ دے خواب کوں وختی شرمندہ تعبیر فرماوے۔