اسلام آباد۔1ستمبر (اے پی پی):وزیراعظم عمران خان آکھیے جو ماضی دیاں حکومتاں تعلیم دے ودھارے کیتے آپݨی ذمہ واریاں پوریاں نی کیتیاں ، لوکاں کوں تعلیم دے ذریعے اڳوں ودھݨ دا موقع نہ ݙیوݨ ظلم تے ناانصافی اے، ٻالڑیاں دی تعلیم کوں اہمیت نہ ݙے تے ملک دا قیمتی اثاثہ ضائع کیتا ویندا پئے ، سکول گھراں توں پرے ہوون تے استاداں دی کمی ہووے تاں مسئلے پیدا تھیندن ، موجودہ حکومت دی کوشش اے جو غریب گھراݨے دے ٻالاں کوں تعلیم دیاں سہولتاں ݙیوے ، جدید ٹیکنالوجی دے استعمال توں سکول وظائف پروگرام کوں شفاف بݨاوݨ تے موثر نگرانی اچ مدد مل ویسی ، اے ڳال انہاں ٻدھ کوں اتھاں احساس پروگرام دے تحت مستحق گھراݨے کیتے سکول وظائف دے اجرا دی تقریب توں خطاب کریندے ہوئیں آکھی اے ۔ تقریب اچ وفاقی وزیر تعلیم و پیشہ وارانہ تربیت شفقت محمود اتے وزیراعظم دی معاون خصوصی سماجی بہبود و تخفیف غربت ڈاکٹر ثانیہ نشتر وی موجود ہن ۔ وزیراعظم آکھیے جو مستحق گھراݨے کیتے سکول وظائف دا اجرا ٻہوں اہمیت دا حامل اے ، ایں پروگرام دے ݙو اہم پہلو ہن، پاکستان اچ ݙو کروڑ ٻال سکول نی ویندے پئے ، ھک تاں انہاں کوں سکولاں اچ داخل کراوݨ تے تعلیم دے زیور نال آراستہ کرݨا اے، بدقسمتی ںال ایں کوں پہلے اہمیت نی ݙتی ڳئی ایہا وجہ اے جو ٻالاں دی اتنی وݙی تعداد سکول نی ویندی پئی ، ملک دا ساریں توں وݙا سرمایہ ایندے عوام ہوندن تے جݙاں اساں آپݨے لوکاں کوں تعلیم نی ݙیندے تاں نہ صرف آپݨا اے سرمایہ ونڄا ٻہندوں بلکہ انہاں تے ظلم تے نا انصافی وی کریندوں جو انہاں کوں ترقی دا موقع نی مل پوندا ۔
حکومت دی کوشش اے جوغریب گھراݨے دے ٻالاں کوں تعلیم دیاں سہولتاں ݙیوے ، وزیراعظم عمران خان دا سکول وظائف دے اجرا دی تقریب توں خطاب
مضمون کا ماخذ : کمپیوٹر لاٹری کے نتائج
متعلقہ مضامین
